Мешавад ин лаҳза дил хандони Ту,
Баъд аз ин дасти ману домони Ту.
Ман набурдам сар ба фармони касе,
Мебарам з-ин пас фақат фармони Ту.
Борҳо паймони худ бишкастаам,
Нашканам боре вале паймони Ту.
Мекунӣ ҳар зарраеро офтоб,
Ман наям як заррае ҳайрони Ту.
Ҷони ман дар туву ту дар ҷони ман,
Гаштаам ҳамрӯҳи ту, ҳамҷони Ту
Меситонам коми худ аз ошиқӣ,
В-он гаҳе худро кунам қурбони Ту. 

Роҳи дил

Бисёр

Раҳ ҷуста ,ёфтаам

раҳ дида, паймудаам

Ин бор                                

Раҳгум задаам ...                       

Эй ёр
Роҳи дилат ку ?

                        

Китоби Сурхи ишқ

Ҳамрадифи ошиқони дерин ,

мисли Вомиқ ,мисли Узро

мисли Хусрав, мисли Ширин ,

мисли Вис мисли  Ромин....

                   будаанд  кам,    мондаанд  кам...

Дарёб маро ,
ҳоло ки дер нест

                                ман ҳам

                                               дар Китоби  Сурхи ишқам .                          

Тухми некӣ -

бикорем!

Решаи  бадӣ

барканем!

Барои ин кор  ,

моро

тамоми фасл -

фасли баҳор!

Рӯи қабри хотиротат

катибае бигзоштам

рӯи ин катиба

 ин ҳарфҳоро бингоштам:

"Ту хамонӣ,

ки хотири маро надоштӣ

Ин манам ,ки  хатто

 хотироти мурдаатро пос доштам!”

Шеъри зинда

Биё
ва пухта кун шеъри хоми маро,
Биё
ва пурра кун шеъри нотамоми маро.
Ту худ шеърӣ !
Зиндатарин шеър!
Чи гуна мешавад

Туро дар шеъре ҷо дод???

БОЯД:
шоядҳои бемадорро
зиндабагӯр кард
ва дар марзи сина
шинонд
ниҳоли "бояд "-ро!

ЗИНДАГӢ:

як шикор аст-
шикори умр


МАРГ:
низ шикор аст
шикори зиндагӣ

Тавба

Ҳарчанд
силӣ мехуранд
тифлони саркаши Эҳсос
аз дасти
               пири Андеша
ҳанӯз
             тавба мекунанд
ҳанӯз
             тавба мешикананд!

Беҳарф

Мондем ману ту
танҳо ба танҳо
                          дар хонаи шаб
ва байнамон
                         ҳарфе набуд....
ҳарфҳои гуфтаниро
бо забоне
                лаб ҷудо
                даст ҷудо
                бозу ҷудо
                                  гуфта буданд...............

Хаёли андӯҳ

                                                                  ...ва хондан
                                                                     хонаи маро хонаи худ
                                                                     маро одами  худ
                                                                     худро саги ман*

Шаб: мезанад аккос саг
"Шояд дар тумани хаёлаш
модасагеро мебинад '
"Ҷеғ мезанад варо ?"
"Ин саг меход оиладор бошад
бачадор бошад
ва хонаашро гузорад
ба ӯ мерос "-
мегӯяд касе нимшунаво

"Бояд ман ун модасагро
аз тумани хаёли ин саг
дур кунам
                  дур кунам
                                    дур кунам"
Ва мезанам дод
ба сари саг:
                    " Бас аккосзанӣ!"
"Ин саг бояд безурёт бимонад!"

* Аз шеъри  "Муроҷиат ба андӯҳ" -  и  Дениз Левертов ,шоираи амрикоӣ

Биё
         ба хонаи дилам!

Иҷоранишин на,
                             соҳибхона шав!

Пепел тишины


Дома
никого
кроме меня
да еще
нужно отметить
 пола
стен
обоев
и...
вошла ты
и я встал
чтобы сбросить
в пропасть
пепел тишины
.

Одиночество

 

Вот мы сидим:
Я и Одиночество, -
и пьём вино вдвоем.
Мы уже почти пьяны,
и одиночество кричит:
- Надоело!!!
я спрашиваю:
- Что?
В ответ:
- Твое одиночество.

Ген поэзии

Вот уже пятнадцать лет,
как во мне поселился поэт .
И все эти пятнадцать лет
я хочу его в себе  убить .
И все никак не удается.

Видимо, его гены сильнее моих....

аз силсилаи ЯКСАТРИҲО

Ба чашми орзуҳоям бузург менамоям!

Нерӯе бояд
                    ногуфтанӣ
то бошӣ озод
мисли бод
аз худу
                аз дигарон

Пурранг
               домони дунё:
чашмхуртарин ранг
ё сафед
               ё сиёҳ

БЕНОМ

Қариби субҳ
орому осуда
беашк
худ бехабар
бо  кадом як  тобуте
хобҳои мурдаро
                            бурдаам
дар қабристони Хотира
                               гӯрондаам....
Субҳ
рӯи қабри хобҳо
аз Шабаҳ -Дарахт
                              гузоштам асо
Чошт
кам- кам  Шабаҳ- Асоро
мекашид қабр ба коми худ
Шом
Асо- Шабаҳ
худ худро бикард гӯр....

ФОСИЛА

Дур нест
Дер нест
                ки одамон
маскан гузинанд дар осмон
в- он гаҳ худоён
гиранд раҳ
                    ба дигар кайҳон

Андӯҳи наққош

нишастааст:
                     мекашад нақш
                                              мекунад пора
зери лаб:
"Ҳазорон сол ангораи Ӯ
                                       мезанад чарх
дар хаёли мардум
ҳазорон сол ӯст бо мардум
аммо ҳеҷ наққоше натавониста
кашидан нақши ӯро "
ва боз зери лаб :
"Ту агар наққоши бузургӣ
боядат нақши Худоро бикашӣ!"

 Ба шаҳри ошиқон ман мешавам мир,
Зи ишқи дилбарон ман мешавам пир.
Туӣ мақсуд, камон ишқ асту ишқ аст,
Барои ин камон ман мешавам тир.

   ДУРИҲО

Он дуриҳои дур
он дуриҳои дури дур
Ҷуз нақши
                    пои ёдҳо
                                        надидаанд!

          МОНАНДӢ

Мову ту
ҳамтақдирем

эй Одам!-

гуфт шабнам:

вақте аз осмон

меоем ба замин

ночор:

яке ба рӯи гул

яке ба рӯи хор.

           СИЯҲАНДӮҲ

Сияҳпарандаи шаби сияҳ,

Сияҳсуруди хешро суруд.

Вале дар он сияҳсукути шаб

Ҷуз ӯву сояаш касе набуд.

НИШОНИ БАХТ

      
Гумкарда ман ситораи сафеди бахти худ

Дар зулмати шаби сиёҳи чашмакони ту,

В-акнун ба чашмакони ту хамӯш бингарам

Бошад, ки бинам андар он дарун нишони ӯ.

Пӯсидаанд
сутунҳои осмон
ва сақфи он
                     роғдор гашта
деворҳо
ранги хеш бохта
                     доғдор гашта...
Ва "меъмори осмон" *
ба таъмири он

таъхир мекунад.

Мо фикр мекунем:

"Шояд Ӯ пир шуда"

Ё Ӯ фикр мекунад;

'Шояд ба таъмир

дигар дер шуда"

* меъмори осмон - таъбири Нодири Нодирпур

   ТАРОНАИ БАХТ

Аз пуштаҳо маҷӯ

беҳуда ҳам

ҳаргиз марав

бар ҳар тараф

                       ба ҷустуҷӯ

хуршеди бахти хешро

танҳо варо бимон

оҳистаяк

осудаяк

аз пушти хоҳишат

                                гардад баланд....

ТАСВИР: ЧАНД ЛАҲЗА ДАР ТАНҲОӢ
          1
Хона
Ман + Ман
ногаҳ эҳсос мекунам:
"Бояд бирақсам.Бояд бирақсам.Бояд бирақсам."
Ва ман мехезаму
меоғозам бехудона
чархидану чархидан
                                    ё рақсидан

          2
Ин рақс нест:
як ҳаракат аст:
                        орому кунд
                        ё тезу тунд
ё рақс аст?
          3
Ва рақсида
ё кунду тунд ҳаракатида
мекушоям даҳонамро
ва мебароянд аз он садоҳо:
аз ҳамсадоҳо
                       аз садонокҳо
ва дар якҷоягӣ,
садоҳо:
              пасту баланд
              кӯтаҳу дароз
              хурду калон
              хушку тар
              нарму сахт
              ҷарангдору беҷаранг
              маънидору бемаънӣ
ва ман садо бароварда
мечархаму мерақсам
мерақсаму мечархам....

       4

Хастагӣ бар ман чира мешаваду менишинам
нафасамро медароварам ба назм

       5

"Ӯ кӣ буд?"
"Ки буд ки рақсид
                  чархид
                  ё садо баровард?"
аммо ман намедонам
намедонам ман
ки ман будам ӯ ё....

       
Хамёзаи дарахт : баҳор : пас аз борон:


шохаҳо
аз бозувони худ
қатраборонҳоро афшонданд
баргҳо
аз дӯши худ
лойшуда гардҳоро афтонданд
навдаҳо
қомати худро
рост карданд
муғҷаҳои таршуда ба худ ларзиданд
шукуфаҳои мурда
аз андоми дарахт
                             сарозер шуданд
...Ва дарахт оҳи сабуке кашид...

              
               Андӯҳи рафтан

Вуҷудамро рӯи қоғаз
                                     меоварам
ва онро
                ба шакли ҳарфҳо
                                                медароварам:
чизе меравад аз ман
                                     бебозгашт
мемонад
                бо ман
андӯҳ -
              андӯҳи рафтан

  НОЛАИ ДАРДМАНД


Ё худоё, ё худо
Дардро дарде бубахш
то бидонад дард чист!

       ИНТИЗОРӢ

Орому сокит
ҳарфхо
калимаҳо
ҷумлаҳо
ва саропо
чашм чашм
ва интизор мнтизор
интизори Чашм

            РАҲМ

Эй абр
бирав дур
аз пеши офтоб
намебинӣ
себарга
чи гуна меларзад

                ОДАТАН;

нимнигоҳе -
                       беқарорӣ
як нигоҳе -
                     интизорӣ
чанд нигоҳе
                      ва безорӣ

    Ҳарорати ёд


Дар зимистони сард
андаруни хона ки об мекунад ях
ёди Ту мекунам
мешавам гарми гарм

     НИКОҲИ НИГОҲ


Нигоҳ кардам
нигоҳ кард
нигоҳи моро
пирамард Фазо
никоҳ кард

   


        ЛАРЗА

Охирин лаҳзаи дидор расид
охирин лаҳзаи дидори ду ошиқ
он лаҳза
                    Лаҳзаро
                                       ларза гирифт

     ДАЪВАТ

Бе об
         дар  Дашти Вожаҳо
 маъние намерӯяд.
Чӣ номардӣ!
Обмонҳои пир
ба нотавониашон
тан намедиҳанд.
Ба рағми онон
эй обмонҳои ҷавон
биёед обӣ кунем
                                ин даштро
то маъниҳо          
                        гуна гуна
                        ба ҳар намуна
                                                   бирӯянд.

   


          МАВҶ

Медавад ӯ
Медавад ӯ
Ва паёми соҳилеро
то ба соҳилҳои дигар
Мебарад ӯ
Мебарад ӯ

    



     АЛИФБОИ ИШҚ

Ягона алифбоест
ки надорад ниёзе
ба ҳеҷ устод
Ҳар ки ошиқ шуд
биёмӯзад худ

  


            ГУЛИ ЁД

Ёди ту
гулакесту ман варо
мебарам
тозаву тар
аз баҳоре
то баҳори дигар

    

              ИШҚ-ЗИЛЗИЛА

Гуфтӣ:
мо ду кӯҳем
ба ҳам намерасем
Аммо
хато кардӣ
Ишқ -Зилзила
моро ҳамоғӯш кард

  

                  ШАБНАМ


Аз дидагони шаб
                                 қ
                                    а
                                        т       қ
                                             р       а
                                                  а      т
                                                                р
                                                                     а
                                                                                мечакад

                                                                                мепарад
                                                                       а
                                                                  р
                                                      а       р
                                                  р       а
                                              р       з
                                          а
                                      з

Аз дидагони субҳ
                                                              


                                   

  

        ДУ ХОБ

Бадтарин
хобе ки дид
Замин:
пур буд
пур буд
з- одамакҳо
Бехтарин
хобе ки дид
Замин:
дур буд
дур буд
з-одамакҳо

Ашк на, нигоҳ

Баъд:


               ча
       ар            шм
д                            он
                                          баст ашк
ҳ                             а
        а               қ
               л

на! на!
             ун ашк набуд
нигоҳ буд:
                       об шуду
                                        р
                                        е
                                        х
                                        т

Мекашид дарди зодан
абр
        дар раҳими хеш
                                     дошт баҳр
раъд фарёде буд
                              пеш аз зоданаш

     ВАЗИШ


Вақте ҳаво
иваз мекард рангашро
биштофтом
то пештар аз бод
бар ту бивазам

            НАСИМ - ОЗОДӢ:

дар ҶАНГАЛ - КИШВАР
ба шоху навдаи дарахтон бархӯрд
захм бардошт:
кунун то баҳамоии захм
маҷбур бояд шуд
ба ШОХУ НАВДАБУРӢ
то ба андозае ки
озод гардад
ВАЗИШ

              Ғамгинона


Роҳ нест
в аз ғами набуданаш
даруни сина
                      оҳ нест
                                   то сар бидиҳамаш
                                   то пар бидиҳамаш
ки ғамро
зери парҳош
                     барад аз тан
                     барад аз ман.....
Оҳ нест
             ва то марзи Оҳ
                                       маро нест роҳ

Дар оина нигаристам:
он чӣ мехостам
дар он бубинам
надидам
оинаро шикастам:
шикастапораҳо
хости маро
бар ман намуданду ман
ба пораҳои шикаста
дил бастам

    ШУДАНӢ Ё НАШУДАНӢ


Эй қаҳрамони хобҳои ман
хуҷаста бод
омад- омади Ту
ба Сарзамини Бедорӣ
аз Хобмарз

       Таронаи сабз


Дар оғӯши сабзи баҳор
чандин мард
бо чандин нигор
доранд ҳарфи сабз мезананд
аз ишқи сабзашон
баъд:
баъди навозиши сабз
бо дасту бозувони сабз
меоғзанд "ҷанги" сабз
ва ғарқа мешаванд
дар баҳри сабзи як лаззати сабз.....
ва чанд лаҳза дар ун сабзҳангом
оҳу воҳи сабз мепечад
дар ҳаво:
                сабз
                         сабз
                                   сабз

Бояд буд
               интизор
то лаҳзаҳои обастан
чи оваранд
                   ба бор

Шаб
сояест
аз мӯи сиёҳи
                     анбӯҳи ту
                     ва андӯҳи ман

     Шабона

фазо:
миёни Рӯху Танам-
аз мусики пур:
нима аз мусиқии Гомхои худ
нима аз мусиқии Гомхои вай
ки ба гӯш мерасид
зи дур
     

                  Аломати Савол

Эй кӯзпушт
Аломати Савол
бод офарин туро:
бо ин хама хамидагӣ
бо ин хама фитодагӣ
бори суоли Дахр ба дӯш
шиквае намекунӣ.

     
      
        Ба дунболи чашмхо



Чашмонамро
                      шитобон
ба дунболи махваше ки
                                        хиромон
мегузашт
                аз хиёбон
                                 гусел кардам.
Чашмонамро
                      гусел кардам:
рафтанду 
                барнагаштанд.
Дар хайратам кунун
ки ба дунболи чашмхо
киро фиристам
                           кучо фиристам?

                  ТАРС

Хомуш мондаем;
                            харфе
аз лабамон намегузарад
фикре -
           аз сарамон

    

              Таронаи Бод


Эй бод
гахвораи киро
мечунбони?

Ӯ тифли кист-
                        намехобад
бо ин кадар
                     лолоит
ором намеёбад?

Чатри дидор

Эй ҳамватан
зери чатри дидорат
бурдам панох
зи борони сарди
ғуссаву
            ғами
                     ғарибиву
                                    ғурбат

  
                                Таронаи Нон


                              
                               АРШ
                         ба
                   рад
              ро
        ба
Ме
Ме
       фа
            ро
                рад
                      ба
                           ФАРШ

                      Суол

Буд
дар хонаи олу
                        сур
бачаи зардолу
                        пурсид;

"Оча , мо чаро он чо нестем? "

                     ТАРОНАИ  СУКУТ
  
Сукут гузашта
        вазнашро
                       бар сари ман
                       бар тани ман
                       бар дили ман
                                              мегузорад
Вазни сукут
                      сарамро
                      танамро
                      диламро
                                     мефишорад
Харфе ку
    к-ин вазнро
                        аз дили ман
                        аз тани ман
                        аз дили ман
                                            бардорад?

                                         Таронаи Орзу
             
                        Ҳар рӯзро
                        ба орзуи ЯК РӮЗ
                        шаб мекунам
                        ва ҳар шабро
                        ба орзуи ЯК ШАБ-
                        рӯз