менависам

бо лабонам

бароят

ширинтарин

шеърамро :

- Бӯса...))

Чӣ шабе!
ситорагон чашмак мезананд.
Дареғ,падарам нобино шуда!

***
چه شبی!
ستاره ها چشمک می زنند 
دریغ پدرم نابینا شده

***


Какая ночь!
Звезды подмигивают.
Жаль, отец ослеп...

Меравӣ?
Бо худ бибар
Сардии зимистонро

***


میروی؟
با خود ببر 
سردی زمستان را!
***


Уходишь?
Забери с собой
холод зимы.

Чашмони падарам

          

Ту нагуфтӣ боре,

чӣ қадар дӯстам дорӣ!

Ман нагуфтам , боре,

чӣ қадар дӯстат дорам!

Аз нигоҳат мехондам

ояҳои дӯст доштани туро.

Аз нигоҳам мехондӣ

ояҳои дӯст доштани маро.

                 2

Ту дигар дар ғами ман

ту дигар аз ғами ман

бохтӣ биноиятро..

Модарам гашта кунун чашмонат

Додарам гашта кунун чашмонат

Хоҳарам гашта кунун чашмонат..

               3

Ва ман..

Кош метавонистам

ҳар ду чашмамро бароят ҳадя кунам.

Медонам чунин ҳадяро қабул нахоҳӣ дошт..

Пас бигир як чашмамро

Пас бигир як чашмамро

Он нигаҳро ба ман баргардон

В- ин нигоҳи маро бихон...

Ба намоишгоҳи 
сангҳои қимматбаҳо омадам...
Куҷост дилат, ай золим?

Фосилаҳо,
фосилаҳо....
Хушбахтии ман
ниҳон дар қалби Шумост!

Хонаи Бедорӣ куҷост?

Ватани ман
дар хоб аст,
Миллати ман
дар хоб аст.
Ё ки бедорӣ рафта ба хоб?
Хонаи Бедорӣ куҷост,
То ба суроғаш биравем....

Ҳаммом омода аст!
Садбарг рӯи об 

сад барг оғӯш кушода
мунтазири туст!)))

Ашки варо намебинӣ,

ашки ӯро нахоҳӣ дид!

Пуроб чашмони моҳӣ.

Хуршеду маҳ ҳамсоли мананд.

Ситорагон бо лолоии ман

бузург шудаанд.

Абр обистани борон

Чашм обистани  ашк.

Чӣ таваллуди деру душворе!

Гелосаки танҳо,

Ғарқи шукуфа шудаӣ.

Табрики маро бипазир!

Садои задани табар,

Фиғони дарахт...

Решаи ҷони мо мехушкад!

Революция слов

Я увидел твой аромат,
Я услышал ласки твои,
Я впитал картину нашего сошествия и соития.
Боже, только ты видишь,
Что за революция в моем сознании!
Слова покидают свои места!
Слова и те взбунтовались! 
Б.А.)
Перевод Темура Варки

Биё
то бо ту қисмат кунам,
нонамро, обамро,
бедориву 
ҳам хобамро!

Инқилоби вожаҳо

Атри танатро дидам,
Дасти навозишатро шунидам,
Акси ишқбозиамонро бӯидам..
Худоё, ин чӣ инқилобест
дар хотироти ман!
Вожаҳо дар ҷои худ нестанд!
Вожаҳо исён доранд!

Рафтан истодан нест,

Истодан рафтан аст,

фақат ба пас,  фақат ба ақиб....!

Ба суроғи ман меоӣ?
Як ҷом биёр,
Як ҷом шеъри ноб!

Дидам ба хоб
ки офтоб 
маро медид хоб...
Мехост ман бошад..
Бедор шудам 
лабрез аз зиндагӣ…..

Ҳайкугуна

Ман аз Ту менависам,

 Тамоми ман оҳиста-оҳиста Ту мешавад..

Биё, то туро бо Ту ошно кунам!

Ҳайкугуна

Мегурезанд рангҳову тобишҳо,

Аз қолаби тасовираш...

Тасвиргаре ҷавон!

Ҳайкугуна

Тамоми шаб нахуфтам.
Интизор будам,
Таваллуди шабнамро.

Мебарам туро,
болотар аз хонаи Худо,
то ба хонаи Ишқ!!!

Охирин умед

Охирин умед

Шохе буду
                 шикаст.
Гарде буду 
                  нишаст...

Биншаста Ӯ кунун
Хомӯшу бесадо.
Уммеди беҳшавӣ,
Ӯ дорад аз Худо!

Биё

Чашмам ба сӯи дар медавад ,
                                                           биё!
Дастам ба дасти дар меравад,
                                                           биё!
Қалбам гирифтааст аз чунин
                                                           сукут
Ҳон, менаоӣ ар, мекафад,       
                                                           биё!

Вақте
мекашӣ сар
аз жарфи як шеър
                 як тарона
                 як мусиқӣ
атрофро
пур мекунӣ аз шавқ
                     аз меҳр
                     аз ишқ .
Вақте
мебарӣ сар
бар жарфи як шеър
                    як тарона
                    як мусиқӣ
шеърро
таронаро
мусиқиро мекунӣ шавқбору
                               меҳрдору
                               ишқсор .

Беном

Боз
на як ҳамдил
на як ҳамроз
боз меоварам
ба дари Танҳоӣ
                           рӯи ниёз
зону мезанам
пеши пайкарааш
                             ба намоз
боз
рӯи ниёз
гузориши намоз
гӯиши роз
                  бо Сӯзу Соз
                                       бо сӯзу гудоз....

ХОБ

Дишаб Худо будам:
офаридан
                 нест кардан
                                       кори ман буд,
лаззату кайфияти
                                офаридгорӣ
                                                     ёри ман буд.
Ва ман бо тамоми ҳастии худоиям
пардохтам ба офаридани Ту.
Дар Ту додам маскан Рӯҳи Зебоиро.
Ту ончунон қашанг шудӣ
ки фариштагон ба ҳуснат ҳасад бурданд
ва ҳуриён аз рашк лол бимонданд.
Аммо аҷиб ин буд
ки ман
               ин Худои Ту
аз худоӣ баромадам
ва ба офаридаи худ
                                    шудам ошиқ.