Калоғҳо

чӣ сафеданд

дар қиёс бо

сиёҳии дили  мардум...

Туро бо абри саргардон сурудам,

Ва ҳам бо майсаи найсон сурудам.

Тамоми ҳастиам як қатра борон,

Туро бо қатраи борон сурудам....

Ончунон дар хештан гум гаштаам,

То  наҷӯӣ  аз куҷо пайдо  шавам?

Хастаам аз хештан аз дигарон,

Сояам бар ман гаронӣ мекунад.

Қасам додӣ ба ишқат нуқта монам
Қасам нашкастаму се нуқта мондам...

Ба дӯстам Шаҳноз Комилзода

Роҳ меравӣ
меравад Роҳ ҳамраҳи Ту

Ту роҳ мешавӣ

роҳ Ту

Бо Ту

 ҳатто вақте чашмонамро мебандам

чаҳон РАВШАН аст!

***

Ин ҷо
донаҳо  рӯиданро,
дарахтон сабз шуданро,

парандагон  париданро,

дарёҳо  ҷорӣ шуданро,

қуллаҳо  сар кашиданро,

шерон  шер буданро,

бурдаанд аз ёд...

Ин ҷо хушкида

ханда дар лабҳои шақоиқ,

табассум фирор карда

аз лабони тифлон.

Ин ҷо

ҳама бемор,

ҳама бешавқ,

ҳама бешӯр,

Ин ҷо мардум равон

мисли гӯрҳои гардон*,

ин ҷо

ранги қабристон ...

Ин ҷо

як даҳон

як даст дуоянд ҳама!

Худовандо,

ту ки мебинӣ,

Худовандо,

ту ки мешунавӣ!

Пас шиква аз ту

пеши кӣ барем?

*ишора ба байти Симини Беҳбаҳонӣ:

Ин ки бо худ мекашам ҳар сӯ мапиндорӣ тан аст,
Гӯри гардон асту дар ӯ орзӯҳои ман аст.

Чи хуш  он рӯз

ки тавонам гӯям:

“Донаи ишқе

ки  коштам

сабз шуду шукуфту

мева дод!”

Чӣ зуд
танҳоиям 
ҳарф задан омӯхт....

Ҳавосанҷҳо
дурӯғ мегӯянд...
Ҳар ҷо ки туӣ ҳамеша офтобист...

Рӯзе
чандин бор
худро
мекашам ба дор...
Мансуро,
ин чӣ меросест,
ки мондаӣ ба ман?

Ҳатто
хокистари орзуҳоямро
ба дасти бод
нахоҳам дод.
Шояд
шарораяке монда  ...

Чӣ инқилобҳое
ки дар  ман мегузаранд.
Чӣ инқилобҳое ки сар нозада
хомӯш мешаванд

Чӣ инқилобҳое

ки хомушанду аз нав сар мезананд.

Чӣ инқилобҳое!...
Аммо ман дар интизори
Як Инқилобам
ки таъхир мекунад
ва чӣ дер мекунад....

Дӯстат дорам
барои ҳарфҳои нагуфтаат.
Дӯстат

дорам барои таронаҳои носурудаат

Дӯстат дорам
барои шеърҳои нонавиштаат...

Дӯстат дораму медонам
ки обастани як шоҳкорӣ.

Ва дар интизорам

ки мелоди Шоҳкорро ба ту , ба худам табрик бигӯям!

Бисту чанд сол аст
ки хобҳои ҳиндӣ намебинад
Ҷумҳурии ман....

Охирин

ҳарфи Одам

ин буд:

"Зиндагӣ

бо Ҳавво

 ширин буд."

Морони китфи Заҳҳок
сахт гуруснаанд...
Мағзе намондааст!

Даври гарданам
дасти навозиши нигоҳат...
Намехоҳам
аз осмони ҳафтум
поён шавам.

Шамоле сахт

бимонд “оҳ”

аз вожаи “Аллоҳ”...